ភ្នំពេញៈ បន្ទាប់ពីកើតមានករណីពុលត្រីកំពត ជាច្រើន
ករណីបណ្តាលឲ្យអ្នកបរិភោគស្លាប់១១នាក់ និងរងគ្រោះ រហូត១០៣នាក់
នាពេលកន្លងមកនោះ រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ
បានចេញសេចក្តីប្រកាសបង្ហាញនូវប្រភេទត្រីក្រពត ៣ប្រភេទ ដែលមានជាតិពុល
និងហាមមិនឲ្យប្រជាពលរដ្ឋបរិភោគទៀតឡើយ។
កាលពីព្រលប់ថ្ងៃទី១៩ ខែមេសា ឆ្នាំ២០១៣កន្លងទៅនេះ
ប្រជាពលរដ្ឋ២នាក់បានស្លាប់ និង១៤នាក់ផ្សេងទៀត
បានពុលក្អួតចង្អោរយ៉ាងធ្ងន់ធ្ងរ កំពុងសម្រាកព្យាបាលនៅមន្ទីរពេទ្យ
បន្ទាប់ពីពួកគាត់បាននាំគ្នាបរិភោគត្រីកំពត។ ហេតុការណ៍នេះ
បានកើតឡើងនៅក្នុងភូមិ-ឃុំព្រៃគ្រី ស្រុកជលគិរី ខេត្តកំ ពង់ឆ្នាំង។
ករណីពុលត្រីក្រពត៣ករណី ផ្សេងទៀត ក៏បានធ្លាប់កើតឡើងជាបន្តបន្ទាប់ផងដែរ
នៅស្រុកស្រីស្នំ ខេត្តសៀមរាប នៅស្រុកស្អាង ខេត្តកណ្តាល ខេត្តឧត្តរមានជ័យ
និងនៅភូមិអម្ពិលទឹក ឃុំសំបួរមាស ស្រុកមុខកំពូល ខេត្តកណ្តាល។
ករណីពុលត្រីក្រពតទាំង ៤ករណីខាងលើនេះ បណ្តាលឲ្យមនុស្ស១១នាក់
បានស្លាប់បាត់បង់ជីវិត និង១០៣នាក់ ផ្សេងទៀត
ត្រូវបានក្រុមគ្រូពេទ្យជួយសង្រ្គោះទាន់ពេលវេលា។
ដោយករណីពុលមានអាការៈធ្ងន់ធ្ងរកើតមានជារឿយៗបែបនេះ កាលពីថ្ងៃទី១៩ ខែមេសា
កន្លងទៅនេះ រដ្ឋបាល ជលផល បានបង្ហាញនូវត្រីក្រពតចំនួន ៣ប្រភេទ
ដែលមានជាតិពុលមិនអាចបរិភោគបាននោះទេ។
នៅក្នុងសេចក្តីប្រកាសដែលមជ្ឈមណ្ឌលព័ត៌មានដើមអម្ពិលទទួលបាននៅថ្ងៃទី២២
ខែមេសា ឆ្នាំ២០១៣ បាន បញ្ជាក់ថា «នៅក្នុងប្រទេសកម្ពុជា មានត្រីក្រពតចំនួន
១០ប្រភេទ ក្នុងនោះមាន៣ប្រភេទមានជាតិពុល។ តាមការស្រាវជ្រាវបានរកឃើញថា
ត្រីក្រពតដែលមានជាតិពុលនោះ រួមមាន៖ Tetraodon cochinchinensis, Mon otrete
leiurus និង Tetraodon fluviatilis ដែលមានភិនភាគដូចក្នុងរូបភាព»។
នៅក្នុងសេចក្តីប្រកាសនោះ ក៏បានឲ្យដឹងផងដែរថា
ត្រីក្រពតមានសារធាតុពុលទាំង៣ប្រភេទ មានជាតិពុលខ្ពស់
បំផុតនៅរដូវពងកូនបន្តពូជ ដែលជាធម្មតាកើតឡើងនៅក្នុងខែកុម្ភៈ និងមីនា
និងចន្លោះខែកក្កដា ទៅខែកញ្ញា។ ចំពោះជាតិពុលនៅក្នុងខ្លួនត្រី
ក៏មានកម្រិតខុសគ្នាដែរ គឺពង និងស្ពែមមានជាតិពុលខ្ពស់ជាងគេ បន្ទាប់មកគឺថ្លើម
ពោះវៀន ស្បែក និងសាច់។
លោក ណៅ ធួក អគ្គនាយករដ្ឋបាលជលផល
បានឲ្យដឹងតាមរយៈសេចក្តីជូនដំណឹងខាងលើនេះថា
ចំពោះអ្នកដែលបរិភោគនូវត្រីកំពតទាំង៣ប្រភេទខាងលើនេះ អាចបណ្តាលឲ្យឈឺក្បាល
វិលមុខ ល្ហិតល្ហៃ រឹងថ្គាម ស្ពឹកចុង ដៃ ចុងជើង រាគរូស ក្អួតចង្អោរ
ឬអាចបណ្តាលឲ្យស្លាប់តែម្តង។
លោក ណៅ ធួក
បានអំពាវនាវឲ្យប្រជាពលរដ្ឋទាំងអស់ពិនិត្យត្រីក្រពតឲ្យបានច្បាស់លាស់
មុននឹងបរិភោគ ហើយបើមានអការៈពុល
ត្រូវបញ្ជូនអ្នកជំងឺទៅកាន់មន្ទីរពេទ្យឲ្យបានទាន់ពេលវេលា
មិនត្រូវធ្វេសប្រហែសឡើ យ៕
ភ្នំពេញ៖ ស្រាបរទេសដែលនាំចូលមកលក់
នៅក្នុងប្រទេសកម្ពុជា មិនមានការក្លែងក្លាយអ្វីនោះទេ ខណៈស្រាបរទេសមួយចំនួន
ដែលកំពុងតែ ចរាចរដាក់លក់នៅក្នុងទីផ្សារកម្ពុជា មានការក្លែងបន្លំគុណភាព
ដែលកត្តាទាំងនេះ វាបានធ្វើឲ្យប៉ះពាល់ដល់សុខភាព របស់ប្រជាពលរដ្ឋកម្ពុជា
ផងដែរ។
