លោកសាស្រ្តាចារ្យ John Campbell ជនជាតិនូវែលសេឡង់ ឯកទេសផ្នែករោគចាស់ជរា។ រូបថត អ.វ.ត.ក 
ភ្នំពេញៈ បើទោះបីជាមានអាយុចាស់ទ្រុឌទ្រោមក៏ដោយ លោក នួន ជា មានសម្បទាគ្រប់គ្រាន់ដើម្បីទទួលការជំនុំជម្រះ។ នេះបើយោងតាមអ្នកជំនាញវេជ្ជសាស្រ្តពីរនាក់ ដែលផ្តល់សក្ខីកម្មនៅតុលាការឧក្រិដ្ឋកម្មសង្គ្រាមកាលពីម្សិលមិញ។
លោកសាស្រ្តាចារ្យ John Campbell ជនជាតិនូវែលសេឡង់ ដែលមានឯកទេសផ្នែករោគចាស់ជរា និងវេជ្ជបណ្ឌិត Seena Fazel ជនជាតិអង់គ្លេសឯកទេសផ្នែកចិត្តសាស្រ្តនៅសាកលវិទ្យាល័យ Oxford បានប្រាប់ អង្គជំនុំជម្រះនិងក្រុមមេធាវីថា ការពិនិត្យរបស់ពួកគេពុំបានរកឃើញថា លោក នួន ជា មានសុខភាពចុះខ្សោយឡើយ។
លោក នួន ជា ក៏ទើបជាសះស្បើយពីជំងឺរលាកទងសួតធ្ងន់ធ្ងរ ដែលបណ្តាលឲ្យលោកចូលសម្រាកពេទ្យកាលពីដើមឆ្នាំនេះ ហើយលោក Campbell បានបញ្ជាក់ថា សំណើរបស់លោក នួន ជា នាពេលថ្មីៗនេះ សុំឲ្យសមាជិកគ្រួសារជុំវិញគាត់ដើម្បីលាលោកនោះ អាចដោយសារការវង្វេងវង្វាន់មកពីជំងឺ។
ទោះជាយ៉ាងណា ការលើកឡើងអំពីសុខភាពល្អនេះ ពុំមានន័យថា លោក នួន ជា ជាបុរសវ័យ៨០ឆ្នាំប្លាយ មានសុខភាពខ្លាំងក្លាឡើយ។ លោកកំពុងតែទទួលបានការព្យាបាលជំងឺបេះដូង បញ្ហាខ្នង ជំងឺលើសឈាម បញ្ហាឈរមិនបានយូរ វិលមុខនិងពេលខ្លះ ទល់លាមក ដែលភាគច្រើនគឺដោយសារសុខភាពចាស់ជរារបស់គាត់។
លោក Campbell បានថ្លែងថា៖ «លោក នួន ជា ទន់ខ្សោយ និងចាស់ជរា។ សុខភាពទន់ខ្សោយគឺដោយសារអាយុ និងបញ្ហាសុខភាព»។ លោកបញ្ជាក់បន្ថែមថា ការខ្វះចលនារាងកាយក៏ជាកត្តាមួយផងដែរ។
ថ្លែងនៅក្នុងសវនាការ លោក Campbell ក៏បានលើកឡើងដោយប្រយោលថា អនាម័យរបស់លោក នួន ជា ដោយសារតែអាយុរបស់គាត់ មើលទៅពុំសូវល្អទេ។
ក្នុងការសួរឆ្លើយទៅវិញទៅមកជាមួយនឹងលោកចៅក្រម Silvia Cartwright ដែលជំរុញលោក Campbell ឲ្យបញ្ជាក់លម្អិតលើសេចក្តីសង្ខេបចុងក្រោយនោះ លោក Campbell បានថ្លែងថា លោកមិនភ្ញាក់ផ្អើលទេ បើលោក នួន ជា ស្លាប់បាត់បង់ជីវិក ក្នុងរយៈពេល ៦ ខែទៀតនោះ៕
0 comments:
Post a Comment